கடலூரில் நாம் தமிழர் கட்சிக்கு தடை: போலீஸ் குவிப்பு.

நாம் தமிழர் கட்சி சார்பில் ஒருங்கிணைப்பாளர் சீமான் தலைமையில் இன்று (சனிக்கிழமை) இலங்கை முள்ளிவாய்க்கால் நினைவு தின கருத்தரங்கு, பேரணி மற்றும் பொதுக்கூட்டம் கடலூரில் நடப்பதாக அறிவிக்கப்பட்டு இருந்தது. பேரணியின் போது பொதுமக்களுக்கு இடையூறு ஏற்படும் என்று கருதிய கடலூர் புதுநகர் போலீசார் இந்த பேரணிக்கு தடை விதிக்க வேண்டும் என்று சென்னை ஐகோர்ட்டில் மனு தாக்கல் செய்தனர். இந்த மனுவை விசாரித்த நீதிபதி, பேரணிக்கு தடை விதித்து உத்தரவிட்டார். இந்த நிலையில் கட்சி நிர்வாகிகள் கடலூர் நகரின் முக்கிய இடங்களில் விடுதலைப்புலிகள் இயக்க தலைவர் மறைந்த பிரபாகரன் மற்றும் சீமான் ஆகியோர் படத்தை அச்சிட்டு 20 இடங்களில் டிஜிட்டல் பேனர்கள் வைத்தனர். இதை அறிந்த கடலூர் துணை போலீஸ் சூப்பிரண்டு சுந்தரவடிவேல் தலைமையிலான போலீசார், இரவு 12 மணிக்கு அந்த பகுதிக்கு சென்றனர். தடை செய்யப்பட்ட இயக்க தலைவர் பிரபாகரன் படத்தை டிஜிட்டல் பேனரில் போடக்கூடாது. அந்த பேனர்களை அகற்ற வேண்டும் என்று கட்சி நிர்வாகிகளிடம் கேட்டுக்கொண்டனர். அதற்கு அவர்கள் நாங்களே அகற்றிக் கொள்கிறோம் என்று கூறினர். பின்னர் பேனர்களை அகற்றுவது பற்றி சிறிது நேரம் கட்சி தலைமை நிர்வாகிகளிடம் பேசிக்கொண்டிருந்தனர். இதை பார்த்த போலீசார் மஞ்சக்குப்பம் பஸ் நிலையத்தில் பிரபாகரன் படம் இருந்த டிஜிட்டல் பேனரை அகற்றினர். உடனே நாம் தமிழர் கட்சி நிர்வாகிகள், தலைவர் பேனரை நாங்களே அகற்றிக்கொள்கிறோம் என்று கூறி, அனைத்து பேனர்களையும் அகற்றினர். இதனால் அங்கு பரபரப்பு ஏற்பட்டது. இந்த சம்பவத்தையொட்டி பிரச்சினை ஏதும் நடக்காமல் தடுக்க 100-க்கும் மேற்பட்ட போலீசார் அங்கு குவிக்கப்பட்டுள்ளனர். இதற்கிடையே கடலூர் மஞ்சக்குப்பம் மைதானத்துக்கு இன்று மாலை நாம் தமிழர் கட்சி சார்பில் பொதுக்கூட்டம் நடத்த போவதாகவும், அந்த கூட்டத்தில் அக்கட்சியின் தலைவர் சீமான் பேசுவதாகவும் அறிவிக்கப்பட்டு இருந்தது. இந்த நிலையில் ஏற்கனவே பேரணிக்கு கோர்ட்டு தடை விதிக்கப்பட்டிருந்த நிலையில் தற்போது பொதுக்கூட்டத்திற்கும் தடை விதிக்கப்பட்டுள்ளது. இந்த தடை உத்தரவை போலீஸ் சூப்பிரண்டு ராதிகா பிறப்பித்துள்ளார். இதையடுத்து இந்த தடை உத்தரவு ஆணையை நாம் தமிழர் கட்சியின் கடலூர் மாவட்ட பொறுப்பாளர் கடல் தீபனிடம் ஒப்படைக்க போலீசார் சென்றனர். ஆனால் வீட்டில் கடல்தீபன் இல்லாததால் தடை உத்தரவு ஆணையை கடல்தீபனின் வீட்டின் கதவில் ஒட்டிவிட்டு சென்றனர். சீமானின் பொதுக் கூட்டத்துக்கு தடை விதிக்கப்பட்டுள்ளதால் கடலூரில் பெரும் பரபரப்பு நிலவி வருகிறது. அங்கு அசம்பாவித சம்பவங்களை தடுக்க கடலூரில் ஏராளமான போலீசார் குவிக்கப்பட்டுள்ளனர்.
[You must be registered and logged in to see this link.]