அரச சார்பற்ற அமைப்புகள் அமர்வில்; அரசுக்கு எதிராக சாட்சியமளிக்க தமிழ் உறவுகள் ஜெனிவாவுக்கு

இன்று ஆரம்பமாகும் ஐ.நா. மனித உரிமைகள் ஆணைக்குழுவின் கூட்டத்தொடரில், காணாமற்போனவர்களின் உறவுகளும் அடுத்த வாரமளவில் சாட்சியம் அளிக்க உள்ளனர். அவர்களை அழைத்துச் செல்வதற்கான ஏற்பாடுகளை மனித உரிமைச் செயற்பாட்டு அமைப்புகளும், அரச சார்பற்ற அமைப்புகளும் மேற்கொண்டுள்ளன.

ஜெனிவா மனித உரிமைகள் குறித்த ராஜதந்திர சமர்க்களத்தில் இலங்கை விவகாரம் சூடுபிடிக்க ஆரம்பித்துள்ள நிலையில், அரசுக்கு எதிராகச் சாட்சியமளிப்பதற்கு காணாமற்போனோரது உறவினர்களும் ஜெனிவாவுக்கும் செல்லவுள்ளனர்.

இவர்களை ஜெனிவாவுக்கு அழைத்துச் செல்வதற்கான ஏற்பாடுகளை மனித உரிமைச் செயற்பாட்டு அமைப்புகளும், அரசசார்பற்ற அமைப்புகள் சிலவும் மேற்கொண்டு வருகின்றன.

அரசுக்கு எதிராக சாட்சியமளிப்பதற்கு இந்தக் குழுவில் காணாமற்போனோர்களின் "உறவினர்கள் சிலரும், காணாமல் போனோர்கள் சம்பந்தமான அமைப்புகளின் பிரதிநிதிகள் சிலரும் உள்ளடங்குகின்றனர்.

அரச பிரதிநிதிகள் கலந்துகொள்ளும் அமர்வு, அரசசார்பற்ற அமைப்புகள் கலந்துகொள்ளும் அமர்வு என ஐ.நா. மனித உரிமைப் பேரவை கூட்டத் தொடரில் இரண்டு பிரிவுகளாக அமர்வுகள் நடைபெறும்.

அதில் அரசசார்பற்ற அமைப்புகளினது அமர்வின்போது அதன் பிரதிநிதிகள் மனித உரிமைப் பேரவையின் உறுப்பு நாடுகளின் இராஜதந்திரிகளுக்கு, நாடுகளின் மனித உரிமை நிலைவரம் தொடர்பில் விளக்கமளிப்பர். அதன்பொருட்டு அவர்கள் ஆதாரங்களை சமர்ப்பிப்பதுடன் சாட்சிகளையும் முன்னிலைப்படுத்துவர்.

அந்த அடிப்படையில் இலங்கையின் மனித உரிமை நிலைவரங்கள் தொடர்பில் விளக்கமளிக்கும்போது, சாட்சியங்களாகப் பயன்படுத்தவே காணாமல் போனோரது உறவினர்கள் ஜெனிவாவுக்கு அழைத்துச் செல்லப்படுகின்றனர்.

அதற்கான ஏற்பாடுகளை அரசசார்பற்ற நிறுவனங்களும், மனித உரிமை அமைப்புகளும் செய்து வருகின்றன. இவர்கள் அடுத்தவாரமளவில் ஜெனிவா நோக்கிப் பயணிப்பர் எனத் தெரியவருகிறது.