உலக நாடுகளை ஏமாற்றி வரும் மஹிந்தவின் சுயரூபம் அம்பலம்; சுதந்திர தின உரையை கோடி காட்டுகிறார் சுமந்திரன் எம்.பி.

அதிகாரப்பகிர்வை அர்த்தமுள்ளதாக்குவோம் என சர்வதேசத்துக்கு வாக்குறுதியளித்து அதனை ஏமாற்றிவரும் ஜனாதிபதி மஹிந்த ராஜபக்ஷவின் உண்மையான நிலைப்பாடு தற்போது வெளிப்படத் தொடங்கியுள்ளது. இதுதான் அவரது உண்மையான நிலைப்பாடு.

இவ்வாறு தமிழ்த் தேசியக் கூட்டமைப்பு சார்பில் நேற்றுத் தெரிவிக்கப்பட்டது. திருகோணமலையில் இடம்பெற்ற சுதந்திரதின வைபவத்தின்போது ஜனாதிபதி மஹிந்த ராஜபக்ஷ ஆற்றிய உரையினூடாகவே அவரது இந்த உண்மையான நிலைப்பாடு வெளிப்படத் தொடங்கியுள்ளது என்று தமிழ்க் கூட்டமைப்பின் நாடாளுமன்ற உறுப்பினர் எம்.ஏ.சுமந்திரன் தெரிவித்தார்.

சர்வதேசத்திடம் அளித்த வாக்குறுதிகளை நிறைவேற்றாத நாடாக இலங்கை மாறியுள்ளது எனத் தெரிவித்த அவர், அனைத்து மக்களும் அரசியல் உரிமைகளைக் கையாளும் வகையில் அதிகாரங்கள் பகிரப்படவேண்டும். நாட்டின் சர்வாதிகாரப் போக்கு மாற்றப்படவேண்டும் என்றும் கூறினார்.

எதிர்க்கட்சித் தலைவரின் உத்தியோகபூர்வ இல்லத்தில் நேற்று இடம்பெற்ற பொது எதிர்க்கட்சிகளின் ஊடகவியலாளர் சந்திப்பின்போதே எம்.ஏ.சுமந்திரன் மேற்கண்டவாறு தெரிவித்தார்.

அவர் மேலும் தெரிவித்தவை வருமாறு:

தமிழர்களின் இனப்பிரச்சினைக்கு அதிகாரப் பகிர்வினூடாகத் தீர்வு வழங்குவோம். அந்த அதிகாரப் பகிர்வை அர்த்தமுள்ளதாக்குவோம் எனவும் 13 ஆவது திருத்தச் சட்டத்துக்கமைய தீர்வு வழங்கப்படும் என்றும் ஐ.நா. செயலாளர் நாயகத்துக்கும், இந்தியாவுக்கும் ஜனாதிபதி மஹிந்த ராஜபக்ஷ உறுதியளித்துள்ளார்.

அதிகாரப் பகிர்வை அர்த்தமுள்ளதாக்குவோம் என கடந்த 7 வருடங்களாக சர்வதேசத்துக்கு வாக்குறுதியளித்து வந்த ஜனாதிபதி மஹிந்த ராஜபக்ஷ, திருகோணமலையில் இடம்பெற்ற சுதந்திரதின வைபவத்தில் ஆற்றிய உரையில் தமது உண்மையான நிலைப்பாட்டை வெளிப்படுத்தத் தொடங்கியுள்ளார்.

ஏழு வருடங்களாக சர்வதேசத்தை ஏமாற்றிவந்ததுதான் அவரது உண்மையான நிலைப்பாடு. அளித்த வாக்குறுதிகளை நிறைவேற்றாத நாடு என இலங்கை மாறியுள்ளது.

நாட்டிலுள்ள அனைத்து மக்களும் அரசியல் உரிமைகளைக் கையாளும் வகையில் அதிகாரங்கள் பகிரப்படவேண்டும். அவ்வாறு அதிகாரங்கள் பகிரப்பட்ட நாடாக இலங்கை மாறவேண்டுமெனில், இங்கு இடம்பெற்றுவரும் சர்வாதிகாரப் போக்கு மாற்றப்படவேண்டும்.

பொதுபல சேனா அரசின் நாடகம் பொதுபல சேனா இயக்கத்தினூடாக முஸ்லிம்களுக்கு எதிராக மேற்கொள்ளப்பட்டுவரும் எதிர்ப்பு நடவடிக்கைகள் அரசின் நாடகமாகும். அரசின் சக்திகள்தான் இந்த இயக்கத்தின் பின்னின்று செயற்படுகின்றன.

தமது ஆட்சியைத் தக்க வைத்துக் கொள்ளவே அரசு இவ்வாறான செயற்பாடுகளை முன்னெடுக்கிறது. இதற்கு மக்கள் ஒருபோதும் இடமளிக்கக் கூடாது என்றார் சுமந்திரன்.

[You must be registered and logged in to see this link.]