4 மாத குழந்தையை கொன்றதாக குற்றம்சாட்டப்பட்ட இலங்கை பெண் சவூதியில் தலை துண்டித்து படுகொலை

by **Admin** Thu Jan 10, 2013 9:13 am

[You must be registered and logged in to see this link.]
இலங்கையில் உள்ள திரிகோணமலை மாவட்டத்தை சேர்ந்த ரிஸானா நஃபீக் என்ற
இளம்பெண் சவூதி அரேபியாவில் வீட்டு வேலை செய்வதற்காக அந்நாட்டிற்கு
சென்றார். கடந்த 2005ம் ஆண்டு தனது பாதுகாப்பில் இருந்த 4 மாதகுழந்தையின்
மரணத்துக்கு ரிஸானாதான் காரணம் என்று குற்றம் சாட்டி அவர் மீது வழக்கு
தொடுக்கப்பட்டது.
மரணமடைந்த குழந்தையின் தாயாருடன் ஏற்பட்ட தகராறில் கோபமடைந்து, ரிஸானா
அந்த குழந்தையை கொன்றுவிட்டதாக போலீஸ் தரப்பில் வாதாடப்பட்டது. மேலும்,
அவரது பாஸ்போர்ட்டில் உள்ள பிறந்ததேதியின்படி, குழந்தைக்கு மரணம்
நேர்ந்தபோது, ரிஸானா 18 வயதை கடந்தவர் என்றும் ஆவணப்படுத்தப்பட்டது.

அவரை வேலைக்கு அனுப்பிவைத்த ஏஜென்சி வயதை உயர்த்திகாட்டியுள்ளது என்ற
வாதத்தை நீதிபதி ஏற்கவில்லை. மேலும், அரேபிய மொழி தெரியாத அந்த பெண்,
வக்கீலை நியமித்துக்கொள்ளவும் வாய்ப்பளிக்கவில்லை என்று கூறப்படுகின்றது.
இந்த வழக்கில் 2007-ம் ஆண்டு அந்த பெண்ணுக்கு மரணதண்டனை வழங்கி
தீர்ப்பளிக்கப்பட்டது.

குழந்தையின் மரணம் சம்பவித்தபோது, ரிஸானாவின் பள்ளிச்சான்றிதழின்படி
அவருக்கு 17 வயதுதான் என்பதால் இந்த மரணதண்டனையை ரத்துசெய்ய வேண்டும் என
இலங்கை அரசு சார்பில், சவூதி அரசாங்கத்துக்கு கடிதம் அனுப்பட்டது. அவரது
பெற்றோரும் சவூதி அரசர் அப்துல்லாவுக்கு கருணை மனு அனுப்பியிருந்தனர்.

இந்நிலையில், மனித உரிமை அமைப்புகளின் கண்டனங்களையும் மீறி, நேற்று
ரிஸானாவின் தலையை துண்டித்து, சவூதி அரசாங்கம் மரண தண்டனையை
நிறைவேற்றியுள்ளது.