10 இளைஞர்கள் புலியாக மாறவேண்டும்!

மாவீரர் தினமான நவம்பர் 27-ம் தேதி, சேலத்திலும் புதுச்சேரியிலும்
எழுச்சியை நடத்தி இருக்​கிறார்கள், திராவிடர் விடுதலைக் கழகத்தினர்!

தனி ஈழம் வேண்டி தங்கள் உயிரை மாய்த்துக்கொண்ட கரும் புலிகள், வான்
புலிகள், கடற் புலிகள் மற்றும் மூத்த தளபதிகள் என 120 பேரின் அரிய
புகைப்படங்கள், புதுச்சேரி, திராவிடர் விடுதலைக் கழகத்தின் சார்பில்
அரியாங்குப்பம் மில்லர் அரங்க வளாகத்தில், வைக்கப்பட்டு இருந்தன.

வீர மரணம் அடைந்த புலிகளுக்கு திராவிடர் விடுதலைக் கழகத்தின் தலைவர்
கொளத்தூர் மணி மற்றும் தமிழக வாழ்வுரிமைக் கட்சியின் தலைவர் வேல்முருகன்
ஆகியோர், தியாக தீபத்தை ஏற்றி வீர வணக்கம் செலுத்தினர்.

முதலில் பேசிய வேல்முருகன், ”உலகில் வாழும் தமிழர்களின் முகவரியான நம்
தேசியத் தலைவரின் கனவையும் லட்சியத்​தையும் சிங்களப் பேரின​வாத அரசு
அழித்ததை, இளைய தலைமுறையினர் மறந்துவிடக் கூடாது.

இது ஒரு சம்பிரதாய நிகழ்வோ, சடங்கோ அல்ல. 10 மைல் தொலைவில் நடந்த இனப்
படுகொலையைத் தடுப்பதற்கு ஆறரைக் கோடி தமிழர்களும் தவறி விட்டோம்.

இன அழிப்புகளை, இனப் படுகொலைகளை, கற்பழிப்பு​களை, கோயில்கள், மசூதிகள்,
தேவாலயங்கள், வீடுகள், மீன்பிடி வலைகள் என்று அந்த மக்களின்
வாழ்வாதாரத்தையே அழித்து வரும் சிங்களவாதிகளின் அட்டூழியங்களை இந்த
நாட்களில் இளைய தலை​முறைக்கு எடுத்துச்சொல்ல வேண்டும். என்றைக்கு இந்த 10
கோடி தமிழர்​களில் இருந்து 10 இளைஞர்கள் புலிகளாக மாறுகிறார்களோ… அன்றுதான்
தமிழ் ஈழ விடுதலை சாத்தியம்” என்று பொங்கினார்.

திராவிடர் விடுதலைக் கழகத்தின் தலைவர் கொளத்தூர் மணி, ”தமிழர்களுக்கு
மட்டுமே சொந்த நாடாக இருந்த இலங்கைத் தீவில் வந்தேறியவர்கள் சிங்களவர்கள்.
தமிழர் தயவால் வாழ்ந்தவர்கள். அவர்கள் தமிழர்களை அடிமைப்படுத்திய வரலாறு,
நீண்ட நெடியது. உலகில் பல விடுதலை இயக்கங்கள் இருந்தாலும், அவர்கள்
அனைவரும் கெரில்லா போர் முறையைத்தான் நடத்தினர். ஆனால், விடுதலைப் புலிகள்
இயக்கமானது, மரபுவழிப் போர் நடத்தும் அளவுக்குத் தனி ராணுவத்தையே வைத்து
இருந்தனர். அது, தமிழனுக்கான தனிப் பெருமை. 1989-ல் நடந்த போரில் போராளி
சங்கர் வீரமரணம் அடைந்த நாளையே, ‘மாவீரர் நாள்’ என்று அறிவித்தார்
பிரபாகரன்.

இந்த நாளில் நான் பெருமையாகக் கருதுவது, முதல் மாவீரர் நாளின்போது
தலைவர் என்னை அழைத்து இருந்ததைத்தான். அது, இந்திய அமைதிப் படை இருந்த
காலம். தலைவரைச் சுட்டுக்கொன்று விட்டனர் என்று பரவி இருந்த வதந்திக்கு,
நான் அவரைச் சந்தித்து வெளியிட்ட படமே முற்றுப்புள்ளி வைத்தது. இப்போதும்
தலைவர் இருக்கிறார் என்பதைச் சொல்ல ஒரு வாய்ப்புக் கிடைக்காதா என்று
ஏங்குகிறேன். தமிழ் ஈழத்துக்கு ஆதரவாகப் பேச, தமிழ்நாடு ஒன்றுதான்
இருக்கிறது. நாம் எழுச்சியும் எதிர்ப்பும் எழுப்பாத காரணத்தால்தான் இன
அழிப்பு நடந்தது. ராஜபக்ஷே மற்றும் அவர்களுக்குத் துணையாக நின்ற இந்தியா,
பாகிஸ்தான், சீனா மட்டும் இன அழிப்புக்குக் காரணம் இல்லை. அமைதியாக நின்ற
தமிழ்நாடும்தான் காரணம். அடுத்த தலைமுறையாவது, ஈழத்தில் ஆதரவுக் குரல்
எதிர் பார்க்கும்போது, நிச்சயம் தன் குரலை உயர்த்தும் என்று நம்பிக்கையோடு
காத்திருக்கிறேன்” என்று முழங்கினார்.

இந்தக் கூட்டத்தைப் போன்றே உணர்ச்சி​மயமாக, புலியூரிலும் வழிபாடு
நடந்தது. இந்தப் புலியூர், சேலம் மாவட்டம் கொளத்தூருக்கு அருகில்
இருக்கிறது. தமிழகத்தில் புலிகள் பயிற்சிபெற்ற இடம். கொளத்தூர் மணியின்
சொந்த ஊருக்கு அருகில் இருக்கும் இந்தக் கிராமத்திலும் எழுச்சி விழா
நடந்தது.

ஊருக்கு மத்தியில் இருக்கும் தளபதி பொன்னம்மான் நினைவு நிழற்கூடத்தில்
தமிழ் உணர்வாளர்கள் கூடி இருந்தனர். ‘தாயகக் கனவில் சாவினைத் தழுவிய
சந்தனப் பேழைகளே…’ என்ற மாவீரர் தினப் பாடல் ஒலிக்க குழந்தைகளும்,
பெண்களும், முதியவர்களும் வரிசையாக நின்று மெழுகுவத்தி ஏந்தி, ஈழப் போரில்
உயிர் நீத்த தியாகிகளுக்கு செங்காந்தள் மலர்களைத் தூவி வீர வணக்கம்
செலுத்தினர். அஞ்சலிக்குப் பிறகு, ஈழ விடுதலைப் போரின் கருத்தியல் நாடகம்
நடத்தப்பட்டது. புலிகள் பயிற்சி பெற்றபோது நடந்த நிகழ்வுகளை, அந்தக்
கிராமத்தில் இருந்த பெரியவர்கள் கூட்டத்தினரோடு பகிர்ந்து கொண்டனர்.

ஈழ ஆதரவாளர்களை மீண்டும் தட்டி எழுப்பி இருக்கிறது இந்த விழாக்கள்!

[You must be registered and logged in to see this link.]

-ஜூனியர் விகடன்-

நூறு இளைஞர்கள் புலிகளாக மாறலாம்