பூந்தமல்லி சிறப்பு முகாமை முற்றுகையிடும் போராட்டம்: வைகோ

பூந்தமல்லி சிறப்பு முகாமை முற்றுகையிடும் போராட்டம்: வைகோ

[You must be registered and logged in to see this image.]

சென்னை ஆக.19: முகாம்களில் உள்ள ஈழத் தமிழர்களை மனித நேயத்தோடு விடுதலை
செய்ய வேண்டும் என்று மதிமுக பொதுச் செயலர் வைகோ வேண்டுகோள்
விடுத்துள்ளார்.

இது குறித்து அவர் விடுத்த அறிக்கை:


தங்களின் பூர்வீகத் தமிழ்ஈழத் தாயகத்தில் கொலைபாதக சிங்களப் பேரினவாத
அரசுகளால் வதைபட்டு இரத்தச் சொந்தங்களைச் சிங்களர் கொடுங்கரங்களில்
பலிகொடுத்து தாய்த் தமிழகம் தங்கள் மனக்காயங்களுக்கு மருந்து போடும்;
இரணங்களைப் போக்கி நிழல் கொடுக்கும் என்று நம்பி உரிமையோடு தமிழகம் வந்த
நம் தொப்புள்கொடி உறவுகளான ஈழத் தமிழர்கள் குறிப்பாக வாலிபப் பருவத்தினர்
இங்கு தமிழகத்தில் போலீசார் விசாரணை என்ற பெயரால் துன்புறுத்தப்படுவதும்
புலிகள் மீதான தடையை நியாயப்படுத்துவதற்காக பொய்வழக்குகள் புனையப்பட்டு
சிறையில் அடைக்கப்படுவதும் கடந்த பல ஆண்டுகளாகவே தொடரப்படும் வாடிக்கையாகி
விட்டது. தமிழ்நாட்டுக்கு வந்துள்ள தங்கள் பெற்றோர் - உற்றாருடன் அகதி
முகாம்களில் உடன்வாழும் ஆறுதலை இழந்து சிறைகளிலும் சிறப்பு முகாம்கள்
எனப்படும் மன உளைச்சல் கூடாரங்களிலும் அடைக்கப்படுவது மனித உரிமைகளுக்கும்,
மனித நேயத்துக்கும் முற்றிலும் எதிரான அடக்குமுறையாகும்.


இப்படித் துன்பப்படும் ஈழத் தமிழ் அகதிகள் நீதிமன்றங்களில் முறையிட்டு
வழக்காடி பிணை விடுதலைப் பெற்றாலும் தமிழகத்தின் உளவுத்துறை கியூ பிரிவு
போலீஸார் மேலும் பொய் வழக்குகள் போட்டு சிறப்பு முகாமெனும் கொட்டடிகளில்
பூட்டுவது அநீதியானது. இரக்கமற்ற அடாத செயலாகும்.

உலகத்தின் பல
நாடுகளுக்கு அகதிகளாகச் செல்லும் ஈழத் தமிழர்களுக்கு அந்த நாடுகளில்
இத்தகைய துன்புறுத்தலோ அடக்குமுறையோ இல்லை. ஆனால், ஆயிரக்கணக்கான ஆண்டுகளாக
நாகரிகத்தாலும், இரத்த பந்தத்தாலும் உறவுகளான கோடானு கோடித் தமிழர்கள்
வாழும் தமிழ்நாட்டில் அவர்களைக் கைது செய்வதும் முகாம் சிறைகளில்
பூட்டுவதும் குருதி வடியும் ஈழத் தமிழர்கள் நெஞ்சில் ஈட்டியைப்
பாய்ச்சுவதாகும். இப்படி அடைக்கப்பட்டவர்கள் தங்களை விடுவிக்கக் கோரி தம்மை
வருத்திக் கொண்டு அறவழி உண்ணாநிலை அறப்போராட்டம் நடத்தினர். சாகவும்
துணிந்து ஜூன் 16 முதல் ஜூலை 5 வரை 21 நாள் செங்கல்பட்டு சிறப்பு முகாமில்
காலவரையற்ற பட்டினிப் போர் நடத்தினர். அனைவரையும் விடுவித்து திறந்தவெளி
அகதிகள் முகாம்களுக்கு அனுப்பி வைப்பதாக தமிழக அரசின் காவல்துறை,
வருவாய்த்துறை அதிகாரிகளும் வாக்குறுதி தந்தனர். ஆனால், கண்துடைப்பாக ஒரு
சிலரை மட்டும் விடுவித்து விட்டு மற்றவர்களை விடுவிக்காமல் கொடுத்த
வாக்குறுதியையும் காப்பாற்றத் தவறி விட்டனர்.

ஈழத் தமிழரான
செந்தூரன் எனும் இளைஞர், எங்களை விடுவிக்காவிடில் நான் உயிர் விடுவேன் என
உறுதியாக உண்ணாநிலைப் போரைத் தொடர்ந்தபோது நான் உள்ளிட்ட பலரும்
மருத்துவமனையில் இருந்த அவர்களைத் தமிழக அரசு எப்படியும் விடுவிக்கும் எனச்
சொல்லிப் பட்டினிப்போரை நிறுத்துமாறு வற்புறுத்தி கேட்டுக் கொண்டதால்
போராட்டத்தைக் கைவிட்டனர்.

ஈழ வாலிபர் செந்தூரனை தேவக்கோட்டையில்
கைது செய்து ஆவணங்கள் இல்லாமல் இந்தியாவுக்கு வந்தார் என வழக்கு பதிவு
செய்து 2011 ஜூலை 18 இல் செங்கல்பட்டு சிறப்பு முகாமில் அடைத்தனர்.

ஆறு மாதம் கழித்து 2012 ஜனவரி 16-இல் தமிழக கியூ பிரிவு போலீசார் அவரைக்
கேரளாவுக்குக் கொண்டு சென்று அங்கிருந்து ஆஸ்திரேலியா தப்ப முயன்றார் என
கேரள சிறையிலே காவல் வைக்க ஏற்பாடு செய்தனர். இரண்டு மாதங்கள் கழித்து
மார்ச் 14-ஆம் தேதி பிணையில் விடுவிக்கப்பட்டவரை கேரள போலீசார் தங்களிடம்
ஒப்படைக்க வேண்டுமெனக் கேட்டு மீண்டும் கைது செய்யப்பட்டு செங்கல்பட்டு
சிறப்பு முகாமில் அடைக்கப்பட்டார். இது தமிழக கியூ பிரிவு போலீசாரின்
அக்கிரமமான நடவடிக்கை ஆகும். கடந்த ஜூன் 3-ஆம் தேதி அன்று சட்டவிரோதமாக
தப்ப முயன்றார்கள் என்று கேரளத்தின் கொல்லம் போலீசாரால் கைது செய்யப்பட்ட
151 பேரில் 14 பேர் கேரளத்தில் சிறை வைக்கப்பட்டனர். மற்றவர்கள் அனைவரும்
விடுவிக்கப்பட்டு தமிழகத்தின் திறந்தவெளி முகாம்களுக்கு அனுப்பப்பட்டனர்.
நேற்றைய தினம் கொல்லம் முதல் வகுப்பு நீதிபதி 12 பேரை விடுதலை செய்து
விட்டார். இன்னும் இரண்டு பேர் விடுதலை செய்யப்பட உள்ளனர். அவர்களைச்
சிறையிலே இருந்து வெளியே கொண்டு வந்து உறவினர்கள் சந்திக்கின்ற வகையில்
தங்க வைக்கப்பட்டுள்ளனர். இந்தப் பதினான்கு பேர்களும் செந்தூரனைப் போல
ஆவணமின்றி இந்தியாவுக்கு வந்தவர்கள்.

தற்போது அவர்கள் தங்கள்
சொந்த நாட்டிற்குச் செல்ல விரும்புவதால் அப்படி அனுப்பிவைக்கவும்
நீதிமன்றம் ஆணையிட்டுவிட்டது. காவல்துறை அடக்குமுறையால் சிறையில் வாடும்
செந்தூரனை உடனடியாக விடுதலை செய்ய வேண்டும். திறந்த வெளிமுகாமிலோ அல்லது
இலங்கைகே செல்ல விரும்பினாலோ அங்கே அனுப்புவதற்கு தமிழக அரசு முன்வர
வேண்டும். தனக்கு இழைக்கப்பட்ட அநீதியை, அடக்குமுறையை எதிர்த்து தமிழக
மக்களின் மனச்சாட்சியைத் தட்டுவதற்காக கடந்த ஆறாம் தேதி முதல் உணவை மறுத்து
வருத்திக் கொண்டு செந்தூரன் உண்ணாநிலை அறப்போரை பூவிருந்தவல்லி சிறப்பு
முகாமில் மேற்கொண்டு வருகிறார்.

கடந்த முறை அவர் 21 நாட்களுக்கு
மேல் உண்ணாவிரதம் இருந்தபோது விடுவிப்போம் என்ற கூறிய தமிழக அரசு அதற்கு
மாறாக வஞ்சகமாக செங்கல்பட்டு சிறப்பு முகாமில் இருந்து பூவிருந்தவல்லி
சிறப்பு முகாமில் அடைத்தனர். இந்தக் கொடுமைகளைக் கண்டித்து தான் உயிரைத்
துறப்பதே மேல் என்று முடிவு செய்து நாளை (20.08.2012) முதல் சொட்டுத்
தண்ணீரும் பருகாமல், தியாக தீபம் திலீபனின் வழியில் அறப்போரைத் தொடர்வேன்
என்று அறிவித்துவிட்டார். அவர் உயிருக்கு ஊறுநேருமானால் அதற்கு தமிழக
காவல்துறையும், தமிழக அரசும்தான் பொறுப்பு ஏற்க வேண்டும்.

எனவே
ஈழத்து இளைஞர் செந்தூரனை உடனடியாக விடுவித்து திறந்த வெளிமுகாமிற்கு
அனுப்பிவைக்க தமிழக அரசு உடன் நடவடிக்கை எடுக்க வேண்டும். செந்தூரனையும்,
பூவிருந்தவல்லி செங்கல்பட்டு சிறப்பு முகாமில் வதைபடும் தமிழ் ஈழ
இளைஞர்களையும் விடுவிக்கக் கோரி 21 ஆம் தேதி செவ்வாய்க்கிழமை காலை 10 மணி
அளவில் பூவிருந்தவல்லி சிறப்பு முகாமை முற்றுகையிடும் போராட்டம் மதிமுக
சார்பில் நடத்தப்பெறும். அதற்கு, தமிழ் உணர்வாளர்கள் பங்கேற்க அன்புடன்
வேண்டுகிறேன்.

- என்று் வைகோ வேண்டுகோள் விடுத்துள்ளார்.