இரத்தினபுரியில் தமிழர்கள் மீது சிங்களவர் இனவெறித் தாக்குதல்

[You must be registered and logged in to see this image.]

சிறிலங்காவின் சப்ரகமுவா மாகாணத்தில் உள்ள இரத்தினபுரி
மாவட்டத்தின் அலுப்போல தோட்டத்தில் தொழில் புரியும் தொழிலாளிகள் வதியும்
குடியிருப்பு மீது 30 சிங்கள இளைஞர்கள் தாக்குதலை மேற்கொண்டுள்ளனர்.
இச்சம்பவத்தில் குறைந்தது ஆறு பேர் வரை காயமடைந்துள்ளதாக
தெரிவிக்கப்பட்டுள்ளது.

இங்கு வாழும் தமிழ் தோட்டத் தொழிலாளிகள்,
இவர்களைச் சூழ மற்றைய கிராமங்களில் வாழும் பெரும்பான்மை சிங்கள மக்களால்
அச்சுறுத்தப்படுகின்றனர். இதன் பெறுபேறாக ஏப்ரல் 17,2013 அன்று தோட்டத்
தொழிலாளிகளின் குடியிருப்பு மீது சிங்கள இளைஞர்கள் தாக்குதலை
மேற்கொண்டுள்ளனர். தற்போது இங்கு எழுந்துள்ள குழப்பநிலையை தடுப்பதற்காக
சிறிலங்கா காவற்துறையினர் சட்ட நடவடிக்கைகளை எடுத்து வருகின்றனர்.

அலுப்போல தோட்டப் பிரதேசமானது 306 கெக்ரேயர் பரப்பளவில் அமைந்துள்ளது.
இங்கு உயர் ரகத் தேயிலை உற்பத்தியாக்கப்படுகிறது. இங்கு 1.2 மில்லியன் கிலோ
தேயிலை ஆண்டுதோறும் உற்பத்தி செய்யப்படுகின்றது. சப்ரகமுவ மாகாணத்தின்
தலைநகரமான இரத்தினபுர நகரிலிருந்து 28 கிலோமீற்றர் தூரத்தில் அலுப்போல
பிரதேசம் அமைந்துள்ளது.

இத்தோட்டத்தில் தொழில்புரியும்
பெரும்பாலான தொழிலாளிகள் 'தொண்டமான்புர' என அழைக்கப்படும் வீட்டுத்
திட்டத்தில் வாழ்கின்றனர். இப்பெயரானது இலங்கை தொழிலாளர் காங்கிரசின்
முன்னைநாள் தலைவர் சௌமியமூர்த்தி தொண்டமானின் நினைவாக வைக்கப்பட்டுள்ளது.

சிறிலங்காவின் முன்னாள் அதிபர்களான ஜே.ஆர்.ஜெயவர்த்தன, றணசிங்க பிறேமதாச,
சந்திரிக்க குமாரதுங்க போன்றவர்களின் அரசாங்கங்களில் சௌ.தொண்டமான்
அமைச்சராக கடமையாற்றினார். இவர் 'தோட்டத் தொழிலாளர்களின் தலைவர்' எனவும்
அழைக்கப்படுவதுடன், தற்போதைய அமைச்சரும் இலங்கை தொழிலாளர் காங்கிரசின்
தலைவருமான ஆறுமுகன் தொண்டமானின் பாட்டனார் ஆவார்.

இவ்வாண்டு
இடம்பெற்ற சிங்கள தமிழ் புதுவருடத்தின் போது அலுப்போல தோட்டப்
பிரதேசத்திற்கு அருகிலுள்ள கல்போட் தோட்டத்தில் இசைநிகழ்வு ஒன்று
இடம்பெற்றது. இந்த நிகழ்வுக்கு தொண்டமன்புர குடியிருப்பு வாழ் மக்கள்
கலந்து கொண்டனர். இந்த நிகழ்ச்சி முடிவடைந்தவுடன் இதில் கலந்து கொண்ட
தமிழர்கள் தமது வீடுகளுக்கு திரும்பிச் சென்று கொண்டிருந்த போது சில சிங்கள
இளைஞர்கள், தமிழ் யுவதிகள் சிலரை மிகக் கீழ்த்தரமான வார்த்தைகளால்
கிண்டலடித்தனர். இதனை அறிந்த தமிழ் இளைஞர்கள் சிங்கள இளைஞர்களிடம்
வாய்த்தர்க்கத்தில் ஈடுபட்ட போது இவர்களை சிங்கள இளைஞர்கள் தாக்கினர்.
இதனையறிந்த அலுப்போல வாழ் தமிழர்கள் சம்பவ இடத்திற்கு விரைந்தனர். இதில்
இரண்டு தமிழர்கள் மிக மோசமான காயங்களுக்கு உட்பட்டு, பலங்கொட
வைத்தியசாலையில் அனுமதிக்கப்பட்டனர். 23 வயதான தமிழ்ச்செல்வன் என்ற
இளைஞனுக்கு தீவிரமாக அடிபட்டிருந்ததால் அவர் வைத்தியசாலையில்
அனுமதிக்கப்பட்டார். பிறிதொரு இளைஞனான விஜயகுமார் சிகிச்சை பெற்ற பின்னர்
வீடு திரும்பினார்.

இத்துடன் இந்தச் சம்பவம் முடியவில்லை. இதன்
பின்னர் நள்ளிரவு 2 மணிக்கு வௌல்வத்தையிலிருந்து 30 சிங்கள இளைஞர்கள்,
அலுப்போல தோட்டப் பகுதியை முற்றுகையிட்டதுடன், 'தொண்டமான்புர' குடியிருப்பு
மீது தாக்குதல் மேற்கொண்டனர். தாக்குதலில் ஈடுபட்ட சிங்கள இளைஞர்களில்
பெருமளவானவர்கள் மதுபானம் அருந்தியிருந்தனர். தமிழர்கள் எமது நாட்டை விட்டு
வெளியேற வேண்டும் அல்லது சாவை எதிர்கொள்ள வேண்டி ஏற்படும் என மிரட்டினர்.
சிங்களக் காடையர் குழு சில மக்களையும் தாக்கினர்.

இதனால் தமிழ்
இளைஞர்கள் குறிப்பாக தொண்டமன்புர வீட்டுத் திட்டத்தைச் சேர்ந்த தமிழ்
இளைஞர்கள் எதிர்த் தாக்குதலில் ஈடுபட்டனர். இதன் பின்னர் சிங்களக்
காடையர்கள் தந்திரோபாயமாக அந்த இடத்தை விட்டு நகர்ந்து குறிப்பிட்டளவு
தூரத்தில் நின்றவாறு தாக்குதல் மேற்கொண்டனர்.

இதன் போது
தொண்டமன்புர குடியிருப்புயை நோக்கி கற்கள் வீசப்பட்டன. இதன் பின்னர்
தொண்டமன்புர வாழ் தமிழ் மக்களும் கற்களை எறிந்து பதில் தாக்குதலை
மேற்கொண்டனர். இதனையடுத்து சிங்கள இளைஞர்கள் அந்த இடத்தை விட்டு
பின்வாங்கிச் சென்று மேலும் பலருடன் திரும்பி வந்து தொண்டமன்புர
குடியிருப்புயை எரித்தனர்.

இதனையடுத்து அலுப்போல தோட்டத்தைச்
சேர்ந்த தமிழ் மக்கள் மலைநாட்டைச் சேர்ந்த தமிழ் அரசியல்வாதிகள், வர்த்தக
சங்கப் பிரதிநிதிகள், மதத் தலைவர்கள் போன்றோரைத் தொடர்பு கொண்டனர்.
காவற்துறையினரிடமும் இந்த விடயம் தெரிவிக்கப்பட்டது. இதன் பின்னர் வௌல்வத்த
பிரதேச காவற்துறை நிலையத்தில் கடமையில் ஈடுபட்;ட காவற்துறையினர் சம்பவம்
நடந்த இடத்திற்கு விரைந்ததுடன், மேலும் வன்முறைகள் ஏற்படாவண்ணம் நிலைமையைக்
கட்டுப்பாட்டுக்குள் கொண்டு வரும் நடவடிக்கையில் ஈடுபட்டனர்.


அலுப்போல தோட்டத் தொழிலாளிகள் மத்தியில் மட்டுமல்லாது இது போன்று
அண்மைக்காலங்களில் இரத்தினபுர மாவட்டத்தில் வாழும் தமிழ் தோட்டத்
தொழிலாளர்களுக்கு எதிராக சூழவுள்ள கிராமங்களைச் சேர்ந்த சிங்கள இளைஞர்கள்
பல தாக்குதல்களை மேற்கொண்டுள்ளனர்.

சிங்களக் காடையர் ஒருவர்
அலுப்போல தோட்டப் பிரதேசத்தில் சில மாதங்களுக்கு முன்னர் அங்கு அமைந்துள்ள
இந்துக் கோவில் ஒன்றை அழிக்கும் முயற்சியில் ஈடுபட்டதாகவும், இதனைத்
தொடர்ந்து தமிழ் தோட்டத் தொழிலாளிகளை எதிர்த்து சிங்களவர்கள் தாக்குதலை
மேற்கொள்வதாகவும், இதன் தொடர்ச்சியாகவே இசைநிகழ்வைப் பார்த்து விட்டு தமது
குடியிருப்புக்குத் திரும்பிச் சென்று கொண்டிருந்த தமிழர்கள் மீதான
தாக்குதல் அமைந்துள்ளதாகவும் முன்னாள் நாடாளுமன்ற உறுப்பினரும், ஜனநாயக
மக்கள் முன்னணியின் தலைவருமான மனோ கணேசனால் வழங்கப்பட்ட ஊடக அறிக்கை
ஒன்றில் தெரிவிக்கப்பட்டுள்ளது.

அலுப்போல மற்றும் கல்பொட தோட்டப்
பிரதேசங்களில் நடந்த வன்முறைச் சம்பவங்களை விட, நிவிதிகல பிரதேசத்தில் உள்ள
டொலஸ்வெல தோட்டப் பிரதேசத்தில் சில நாட்களின் முன்னர் வன்முறைச் சம்பவம்
ஒன்று இடம்பெற்றதாகவும், இதேபோன்று பெல்மடுல்ல பிரதேசத்தின் லெலோபிற்றிய
மற்றும் கோணகும்புர தோட்டப் பிரதேசங்களில் ஒரு வாரத்தின் முன்னர் இத்தகைய
வன்முறைச் சம்பவம் ஒன்று இடம்பெற்றதாகவும் மனோ கணேசன் தனது அறிக்கையில்
தெரிவித்துள்ளார்.

இவ்வாறான வன்முறைச் சம்பவங்கள் அனைத்தும்
மலையகத் தோட்டங்களில் வாழும் தமிழர்களை இலக்கு வைத்து சூழவுள்ள
கிராமங்களில் வாழும் சிங்களவர்களாலேயே மேற்கொள்ளப்படுகிறது. இது தொடர்பில்
விரைந்து நடவடிக்கை எடுத்து, கேகாலை, இரத்தினபுர மாவட்டங்களில் வாழும்
தமிழ் மக்களின் பாதுகாப்பை உறுதிப்படுத்துமாறும் மனோ கணேசன், இலங்கை
தொழிலாளர் காங்கிரஸ் கட்சியின் தலைவரும் கால்நடைகள் மற்றும் கிராமிய சமூக
அபிவிருத்தி அமைச்சருமான ஆறுமுகன் தொண்டமானிடம் கோரியுள்ளார்.


பெரும்பான்மை சிங்களவர்கள் மத்தியில் வாழும் சிறுபான்மை மலையக தமிழ்
தோட்டத் தொழிலாளர்களின் பாதுகாப்பை உத்தரவாதப்படுத்தும் சிறப்பு
நடவடிக்கைகளை எடுக்க வேண்டியது மிக இன்றியமையாதது என மனோ கணேசன் மேலும்
தெரிவித்துள்ளார்.